喺國共內戰期間，國民政府喺遼瀋戰役、淮海戰役中戰敗，令總統蔣介石開始計劃將國民政府同軍隊遷移到台灣，準備日後反攻大陸。既然要打仗，就梗係要洗好多錢，於是蔣介石就安排將國庫入面嘅黃金都帶埋去台灣。

當時蔣介石密令中央銀行總裁俞鴻鈞「乾坤大挪移」，將上海中央銀行嘅國庫黃金運去台灣。國庫入面嘅黃金一共分三批運走，第一批就運咗200萬兩，第二批運咗大約57萬兩，第三批就運咗大約20萬兩。運完黃金嘅十日後，共產黨攻佔上海，當佢哋走到去有三個籃球場咁大嘅金庫入面，就發現啲財富所餘無幾。

蔣介石後來講過，如果當初國民政府遷台無呢批黃金，台灣嘅經濟早就不堪設想。蔣介石個仔、台灣前總統蔣經國亦曾經形容，呢批黃金係「全國同胞血汗之結晶」同「國脈民命」，可見呢批黃金對台灣經濟係幾咁重要。

圖中木桶放有從大陸運去台灣嘅黃金，圖片取自網絡。